FISH PIE

اول مره تشوقت فيها اسوي الوصفه يوم شفت جيمي اوليفر في bbc food  in naked chef  ... الاساس المكون للطبق المزيج الاشهر في المطبخ الريطاني  سمج وبطاط وهالوصفه غالبا تلقونها في كتب الطبخ العربيه والغربيه وتصلح حق ايام البرد لانها ثقيله 

وصفه جيمي اوليفر كانت حلوه ومتروسه  بحيث ما تحسون بطعم السمج  ورح تعجب كل اللي ما يحبون طعم السمج القوي تلقون الوصفه على هالسايت

http://www.bfeedme.com/jamie-oliver-fish-pie-recipe

هالوصفه اخذتها من كتاب طبخ عادي اسمه 200 quick supper وضفت لها شوي افكار من وصفه جيمي اوليفر


الصلصه او البشاميل لازم يكون ثقيل و تقدرون تضيفون اي مكونات مثل ربيان او اي نوع خضار معاها وتقدرون تضيفون جبن على الويه عشان لون البطاط يتحمر اكثر من جذي

المقادير:

قطعه سمج هامور فيليه

قطعه سمج سالمون

تقريبا لتر حليب

ورق غار
عود ساليري
leek   (( اعتقد كراث ماعرف اسمه بالعربي بس جنه بصل اخضر كبير  )) مقطع شرايح ضعيفه
بقدونس تقريبا ربع شده
جبه جزر مقطعه اربع
 ملح وفلفل اسود
جبن تشيدر  وانا استخدمت الابيض المعتق حسب الرغبه انا حطيت خمطتين كبار
اعشاب عطريه مثل الاوريغانو او الزعتر او اي شي تحبونه
4 حبات بطاط مقشره ومسلوقه
زيت زيتون
3 قفاش كبيره طحين 
حبتين صغار زبده ام 10 غ

الطريقه:

ناخذ السمج بعد ما نغسله ونضيفه بمقلاه غزيره او جدر مع الحليب وورق الغار واعواد البقدونس ( نشيل الاوراق ما نضيفها ) و نص عود الساليري والجزر وتقريبا ربع الكراث مع الملح والفلفل الاسود ونتركه على النار لين تستوي السمجه ( اول ما تغزونها بالشوكه بتشوفونها تتفتت )

نسحبها بالشوكه ونخلط معاها الساليري ووباجي الكراث والاوريغانو ونحطها بصينيه الفرن

نشخل الحليب بتشوفونه صار حوالي كوبين 

نذوب الزبده بالنار ونضيف لها الطحين ونحمره شوي وبعدين نضيف الحليب شوي شوي عشان نكون صلصله البشاميل ولما يبتدي يثقل نحط الجبن ونحركه بسرعه عشان يذوب وا خر شي نضيف البقدونس ونضيفهم كلهم فوق خلطه السمج

نهرس البطاط ونضيف له شوي زيت زيتون وملح ونضيفه فوق البشاميل ... اذا حبيتو تقدرون تخففونه بحليب بس انا شفت الحليب اللي بالبشاميل كفايه وتقدرون تضيفون جبن مره ثانيه على الويه

ندخله الفرن لين يتحمر البطاط.. حوالي ثلث الى نص ساعه زقدمو بالف هنا وعافيه

simple pizza

كنت اشوف اليوم food network  وكان البرنامج سؤال وين الذ بيتزا اكلتها؟

الاجوبه كانت عذاااااااب .. اصناف بيتزا عجيبه وغريبه شي معاه فستق وشي بيض وشي ككاو مع مارشميلو وموز

بس اتفقو على شي واحد السمك يكون ضعيف ومقرمشه... وامتن بيتزا شفتها كانت اضعف من الثن كرست بمطاعمنا من طقه دومينوز وبيتزاهت و باباجونز يخلينا نتسالءل ليش  ثقافه البيتزا عندنا غير ؟؟

عقب البرنامج ما قدرت  اقاوم وننزلت اسوي لي بيتزا بالافكار اللي شفتها... سويتها والنتيجه يم يم لذييذه صراحه ما قاومت واكلت قطعه قبل لا اصور...

يوم رحت المطبخ ماكان  لي خلق اعجن بس الخبزه الخفيفه لها نفس المفعول استخدمت خبز اسمر خفيف عشان الالياف

صلصه البيتزا تقدرون تستخدمون اي شي انا عندي صلصه بيتزا مسويتها وحاطتها بالثلاجه ... اذا كنتم بتستخدمون الصلصه الجاهزه عدلو الملح على ذوقكم لان اكره شي تاكلون بيتزا ماصخه

والحشوه كان عندي جم نوع مشروم

نوع الموتزريلا الي استخدمته قالب من مركز سلطان وينن يذوب ذوبان واللي تحب المبشور استخدمو ماركه كرافت لانه احسن نوع مبشور بوجهه نظري وهم تحصلونه بمركز سلطان

الطريقه

اول شي ابطل الفرن على اعلى درجه حراره وارفع الشبك حق اول رف

لاني كنت ابي الخبزه مقرمشه فسخنتها وحطيت فوقها الصلصه وانواع المشروم والجبن ولاوريغانو

دخلتها الفرن وباقل من 10 دقايق صارت جاهزه بس نطرو يذوب الجبن

رشو عليها زيت زيتون على الويه وبالف عافيه

رح  الغي البوست السابق

البنت دزت لي رساله واعتذرت

اشكركم كلكم وعلى راسي والله

كلامكم كان مثل البسلم

نون النساء 

شاي الضحى 

 Hope 

Muslema 

Sn3a 

flaanh 

شكرا من كل قلبي ويا بختي فيكم :>

فطاير سبانخ

 

هالوصفه نسيتها فتره طويله وتفاجات اني ما نزلتها وانا افضي الفلاش

استخدمت بالحشوه سبانخ فرش مع رمان تقدرون تستخدمون المثلج او تقدرون تطبخونه وتقدرون تستبدلون الرمان بالجوز او تضيفون اي حشوه 

  استخدمت عجينه هند الذهبيه بس انا خلطت اسمر وابيض :>

 نص بنص العجينه تلقونها بهالرابط

 مقادير الحشوه حسب الرغبه مثل ما قلت :

بصل
رمان
سبانخ فرش
سماق
دبس رمان
بابريكا
ليمون
زيت زيتون
ملح

الطريقه:

في البدايه قصصت البصل مكعبات وضفت عليه السماق وفركته وخليته

وبعدين حطيت سبانخ فرش وعليه تقريبا كميه متساويه من زيت الزيتون واعصير الليمون والملح وخليته فتره تقريبا ربع ساعه عشان ينزل السبانخ الماي ماله وبعدين عصرته بيدي عشان السوائل اهي اللي تفتح العجينه وهي بالفرن وخلطته مع البصل والرمان الفرط وحطيت عليه قفشه صغيره دبس رمان وهني الحشون تكون خالصه

نحط ببالنا ان العجينه اذا فيها طحين اسمر تاخذ وقت تخمير اكثر من الطحين الابيض او تقدرون تزيدون الخميره عشان ترفعها بنفس وقت التخمير العاديه :>

نرقها ونقصصها دوائر

 

ونحط الحشوه بالنص بس ما نكثر وايد

 

نسكرها ونقرص العجينه عدل عشان ما تفتل

 

نمسحها ببيض مخلوط مع حليب و تقدرون تخلطون بيض ونتفه قهوه اذا تبونها محمره وترشون سمسم بالويه وتدخلونها فرن 180 لحد ما تتستوي وبالعافيه :>

سمج مقلي

السمج المقلي ماكو اسهل منه... بنزله بالتفصيل الممل بناء على طلب وصلني من الايميل...واشكرج اختي على الكلام الجميل اللي قلتيه في حقي :>

هالصوره قديمه واستخدمت زبيدي بس تقدرين تطبقينه باي نوع سمج

تنظيف السمج ما عندي له صوره بس باول طبخه سمج رح اصورها وارد انزلها بالموضوع :>

قبل لا نبتدي بالمقادير بتكلم عن طريقه تنظيف السمج:

الحين باي مكان نشتري منه السمج تقدرون تقولين لهم يبطلونها وينظفونها طبعا الفتحه بالبطن او الظهر حسب الرغبه :>

وطريقتي بالتنظيف اذا رديت البيت  اول شي اسوي امرر عليه سجين السمج مال السفط بعكس اتجاهه عشان اتاكد انه مسفطها عدل (( والشي نادر لازم اكو قشور مو مشيوله )).. تقدرون تستخدمون سجين عادي او السجين مال  السفط وشكله مثل المشط وتحصلونه بسوق السمج بالمحلات اللي برا 

الخطوة الثانيه ارد اغسلها واقص الذيل واذا اكو زعانف بمقص خاص فيهم وتحصلونه بايكيا او اي مركز سلطان او حتى بالجمعيات بلوازم العائله

وبعدين ابطلها من داخل واتاكد ان ماكو اشلاء وبظهر السجين اطلع الدم الاسود اللي بالنص... في اماكن ماقدر اوصل لها فاستخدم لها فرشاه اسنان عشان اتاكد انها نظفت كامل لان الزفره غالبا تكون من هالشي

الحين بعد ما غسلتها انقعها تقريبا ربع ساعه بملح خشن وزنجبيل مدقوق وعصير ليمون ومو الا تستخدمون ليمون فرش انا استخدم غراش ليمون الربيع ... صدقوني هالخطوه بتطير كل الزفره اللي بالسمج 

واخر خطوه اختياريه واستخدمها اذا حسيت ان السمجه قديمه او انها محتاجه تنظيف زياده .. افركها بطحين او بنخاله واغسلها الغسله الاخيره واتبلها استعدادا للقلي

لا تستصعبون هالخطوات ترا سهله 

المهم 

مقادير البهارات حسب الرغبه احنا بالبيت نحبهامتبله عدل

نخلط كركم و بهارات سمج مجدي وكمون وثوم بودر وملح واخليها ربع لي ثلث ساعه واذا تحبونها تقرمش زود تقدرون تغطونها بطحين قبل القلي ( عاده اسوي هالحركه مع النويبي والجنعد بس الزبيدي احبه من غير طحين )

طريقه القلي

نقلي بزيت  حار .. يعني اذا قطيت فيه قطعه خبز تصير ذهبيه

ونخلي الزيت بحيث يغطي نص السمجه

وفي طريقه تعلمتها من امي الله يرحمها احط شوي ثوم مدقوق في المقله قبل لا احط الزيت عشان يتنكهه من الثوم

السمجه اول ما احطها بالزيت اخليها شوي وبعدين اخفف النار عشان لا تحترق ويتم لونها ذهبي وما نستعيل واحنا نقلبها عشان لا تلزق وتتفتت

ونفس الشي اذا قلبناها

واول ما نشيل السمجه نرش عليها شوي ليمون وقدموها مع خبز او سلطه او عيش محمر وبالعافيه :>

My Famous Double Hot Chocolate

ان شاء الله ما تاخرت بهالوصفه وتلحقون تطبقونها بباجي ايام البرد :>... رح نحط فيها ككاو بودر وشوكليت شيب وككاو سائل ونزينها بكيت كات بعد ويا حلاته وهو ذايب معاهم يم يم  هههه

الوصفه تكفي 3 اكواب .. واضافه المارشملو مو ضروريه بس اختي الصغيره تحبها :>

المقادير :

ربع كوب شوكليت شيب من اي ماركه

ربع كوب سكر

3/4 كوب حليب بودر

3/4 كوب بودره ككاو نسكويك

3 اكواب ماي دافي

فانيليا حسب الرغبه 

ككاو سائل حسب الرغبه

مارشملو

كيت كات

الطريقة:

نخلط الككاور البودر والسكر والحليب والماي والشوكليت تشيب على النار لين يذوب التشوكليت تشيب ونضيف الفانيلا والحليب حار

نحط المارشملو على الويه والككاو السائل والكيت كات وتمتعو بطعمه وبالف عافيه

yoyo's salad

 

هالسلطه تذكرني بالمثل " ما يعيب الا المعيوب " اخوي الغالي اكثر واحد يعلق اذا خلطت او فنتقت بشي غريب

ومناشبني اذا حطيت شيين اهو ما يحبهم مع بعض

مره من المرات كنت طالبه بوفيه سلطه وحاطه الذره يم التبوله .. ذاقها والمزيج عجبه ومن يومها ما قام ياكل التبوله الا مع ذره

وطبعااغير بالدريسنغ مره احط ليمون وملح وزيت ومره دريسنغ ايطالي ومره فرينش يعني مع اي دريسنغ تمشي

اعتقد مكوناتها مبينه... تبوله وفوقها ذره ... جرزبها وان شاء الله تعجبكم

وصفه التبوله موجوده ببلوقي :>

yoy

مجبوس دياي

هالمجبوس له مليون اسم اما مجبوس طماط او مجبوس حساوي او مجبوس احمر او مطمطه (( اعتقد تنكتب جذي ))

انا ضفت له حشو مكسرات مع زرشت برايي تعطي طعم احلى... البهارات اللي استخدمتها ناعمه ومطحونه كلها من سمراء عدن

المقادير:

ديايه منظفه

طماط مهروس

بصل مفروم

ثوم مدقوق

فلفل اخضر حار ( للنكهه ومو ضروري )

بهارات المجبوس كامله ( كزبره و هيل و مسمار وهيل حبشي و بهار وفلفل اسود وورق غار ودارسين وزنجبيل )

ملح

بهارات ناعمه

بزار

ليمون اسود ناعم

هيل ناعم

معجون طماط

عيش مغسول ومنقوع بماي وملح لمده ربع ساعه

خليط من سمنه وزيت

صنوبر

لوز 

زرشت

الطريقه:

نحمس البصل واذا ذبل نضيف له البهارات ونحمسهم لين تطلع ريحتهم

نضيف الهيل الناعم والبهار واللومي والدياي ونقلبها على النار مع البصل والبهار وبعدين نضيف الطماط والملح والماجي اذا حبيتو والفلفل ونخليها تطبخ لين تستوي ثلاث ارباع 

نشيلها ونرش عليها بهار ناعم ودارسين ناعم ولومي وهيل وندخلها الفرن تتحمر

الحشو: نقلي المكسرات في البدايه ونشيلها على جنب

نغسل الزرشت وننقعه بماي دافي عشان يتفتح

نقلب البصل على النار من غير زيت مع رشات ماي لين يذبل وبعدين نضيف الزيت والهيل الناعم والدارسين والبهار مع المكسرات والزرشت واذا تحبون ضيفو ماي ورد يعطي ريحه حلوه وقلبوه قلبتين وبعدين قدموه مع المجبوس وبالف عافيه

هوم ميد تشيزبرغر ..حياكم

 البرجر من الوجبات المفضله جدا جدا عندي ..حبيت اطبقها عندي في البيت  لان اغلب المجمد فيه نسبه من بروتين الصويا اللي يخلي طعم البرغر مطاطي..قريت وايد وصفات بدءا من النوع الكلاسيكي ونهايه بافضل وصفه برغر مكتوبه...سمحولي اطول بالمقدمه لان في اشياء حابه اشرحها قبل لا ابدي بالوصفه

اغلب الوصفات تتفق على شيين

 1- اللحم يجب ان يحتوي على نسبه دهن .. افضلها 80:20 .. وكثير من الوصفات تنصح بمزج اكثر من قطعيه لحم  (( سيرليون ، بريسكت ، ريب اي ...الخ)) عشان النكهه وعشان تحقق نسبه الدسامه .. وتقدرون تخلطون اكثر من نوع تيركي ولحم ..غنم وبقر ..دياي وتيركي ..لحم وهوت دوغ وهلم جرا

2-من الافضل انكم تشوون برغر طازج يعني اللحم من اللحام الى الشوايه

3- هذي بطريقه الشواي نفسه المفروض متى ما حطيتو اللحم على الشوايه تخلونه ياخذ راحته وما تقلبونه الا مره وحده وما تضغطون عليه عشان  يحتفظ بعصارته ويكون جوسي

4- الملح ما ينضاف الا بالاخير

5-انا استخدمت جهاز عشان يشكل لي اياهم بالطريقه المعتاده (( الجهاز متوفر  بمركز سلطان وسعره ما يتعدا الدينار ونص )) اذا كنتو بتشكلونه بيدكم ضغطو بابهامكم بنص البرجر عشان  يحتفظ بشكله وما يصغر حجمه بالشوي

هذي صوره الجهاز اللي قلتلكم عنه

الحين ملاحظاتي الخاصه لهالوصفه ... في البدايه استخدمت هالوصفه بعنوان BEST BURGER EVER   وتوقعتها احلى بوايد... فزدت عليها ونقصت لما صارت جذي وخواتي وايد حبوها ... البيض بالوصفه ما يفرق بالطعم كلش بس يساعد البرجر على الاحتفاظ بشكلها على الشوايه... الفلفل والشوفان مرح تحسون بطعمهم بس من غيرهم اللحم بسرعه يتفتت.. بالنسبه الى اللحم حطيت نوعين ريب اي و سيرليون بنسبه 2:1

واذا عندكم وصفات ثانيه حق البرغر  مجربينها وحابين تجربونها ومتخوفين منها عطوني اياها حق الويكند الياي ونسوي مسابقة  حق احلى وصفه برغر ..شرايكم ؟ :>

الحين نبتدي بالمقادير :

750 غرام لحم مفروم مرتين ناعم ( نص كيلو سيرليون وربع ريب اي )

ربع كوب + قفشه كبيره شوفان ( اذا ما حبيتو الشوفان تقدرون تستخدمون بقسماط )

بيضه

2 قفاش كبيره  صلصله وسترشاير ( واذا تحبون نكهتها اكثر حطو حسب رغبتكم )

قفشه صغيره ليكويد سموك ( موضروريه اذا مو متوفره عندكم )

قفشه صغيره صلصه فلفل او شطه  ( مو تباسكو عشان لا تصير حاره )

قفشه صغيره فلفل اسود

كيس شوربه بصل واستخدمت ماركه ليبتون

ربع قفشه صغيره بهار ستيك

ربع قفشه ثوم بودر

ملح حسب الرغبه
جبن تشيدر

صمون همبورجر

خس مبشور

طماط حلقات

مايوتشيب

واذا تحبون مخلل او بصل او اي اضافه تحبونها

الطريقه:

نخلط اللحم مع البهارات وجيس الشوربه ونوعين الصلصه والشوفان والبيض ونعجنهم عدل ونقسمهم حسب الرغبه بالسمك اللي تحبونه

انا طلع معاي 8 قطع

وشكلتهم بالطريقه  المعروفه ورشيت على الجهتين ملح

شويتهم على نار حاره في البدايه وبعدين  متوسطه ونطرت 3 دقايق تقريبا قبل لا اقلبها على الويه الثاني

وبعد ما يستوي الويه الثاني تقريبا احط الجبن عشان يذوب ( انا استخدمت المايلد تشيدر باول مره وثاني مره شارب وكلهم حلوين )

نحمص الساندويش ونمسح عليها المايوتشيب والخس والطماط وونحط البرجر مع الجبنه الذايبه يم يم وبالف عافيه

انا قدمتها مع كولسلو وبالف عافيه

عيش شبنت مع لحم بطريقتي

 

من الوصفات اللذيذه .. نكهه العيش مع الشبنت وريحه اللحم مع الزعفران مغريه جدا...هالوصفه اخذتها وعدلت عليها بطريقتي وبتلاحظون في اختلاف بينها وبين الطريقه المتعارف عليها..طبعاتقدرون تضيفون باجلا خضرا معها اذا حبيتو

المقادير اللي بذكرها تقريبيه لان بصراحه لمااطبخ احط على النظر

المقادير:

لحم تقريبا كيلو

شبنت تقريبا شدتين او ثلاث على حسب حجم الشده

نص شده نعناع

شده كزبره

حبتين فلفل اخضر حار مفروم

ربع فلفل اخضر بارد مفروم

بصلتين كبار مقطعين ارباع 

بصله كبيره مفروم

طماطتين كبار مقطعه ارباع

5 فصوص ثوم كامله

بهارات عدله : 3 مسمار + 2 لومي+ عودين دارسين+5 حبات فلفل اسود+ 6 هيل + قطعه زنجبيل ناشف +2 هيل حبشي اذا متوفر + ورقه غار

بهارات ناعمه : هيل ناعم ودارسين ناعم حسب الرغبه + قفشه صغيره كاري+ قفشه صغيره بهار + ربع قفشه صغيره فلفل اسود + نص قفشه صغيره بزار

مكعب ماجي لحم خروف

زعفران منقوع بماي ورد ونتفه هيل ناعم

بطاط مقطع حسب الرغبه

وملح

زيت او سمنه او خليط من الاثنين

جيلتين عيش مغسول ومنقوع

الطريقة:

نغسل اللحم ونفوره بماي 3-5 دقايق ونقط الماي عشان نتخلص من الزفره والريم اللي يطلع

نسلق اللحم مع البهارات العدله و ارباع الطماط والبصل والثوم ونتركه لين يقارب على النضج وبعدين نضيف الملح والماجي والبطاط ونتركهم لين يكمل اللحم سواه 

نشخل المرق ونشيل اللحم ونرد عليه نص البهار الناعم والهيل والدارسين وماي الزعفران وندخله الفرن عشان يتحمر او تقدرون تقلونه مع البطاط

ناخذ البطاط ونقليه لين يتحمر( لانه بيكون نص سوا )

نحمس البصل ونضيف له البزار والكاري والبهار مع الهيل الناعم والفلفل الاسود ونضيف له انواع الفلفل والخضار ونخلصها عدل على النار لين يصوفر لونها

نزيد علبها ماي سلق اللحم ونتركه اولما يغلي نسقط عليه العيش ونتركه على نار عاليه لين ينشف الماي وبعدين نرش شويه دهن على الويه مع رشه هيل ناعم على الويه و نخليه على نار خفيفه لين يستوي عدل

وبالف عافيه